
O mércores, 13 de decembro, ás 19 horas, acollemos a presentación do libro Entremurallas, de María de la O Cores, filla do avogado, xornalista e escritor Baldomero Cores.
A obra céntrase na actividade xornalística do intelectual, durante o período comprendido entre os anos 1940 e 1962, cando Baldomero Cores residiu no número 9 da rúa compostelá Entremurallas, onde se xestaron os seus primeiros artigos.
En palabras da autora, o libro invita a percorrer a infancia, a xuventude, a vida de estudante, as inquietudes e a "intensa actividade despregada en distintos eidos do coñecemento, producida sempre dende unha perspectiva firme e perserverante a prol da defensa e enxalzamento da cultura galega", co fin de manter viva a chama do legado de Cores.
A asistencia á presentación do libro é libre e as persoas asistentes recibirán como agasallo un exemplar do libro.
