O martes, 20 de outubro, ás 19 horas, o Museo do Pobo Galego acolle a presentación do documental O río do Porto, o río grande da Terra de Soneira, que adapta o libro homónimo editado polo Seminario de Estudos Comarcais da Costa da Morte (SEMESCOM), co obxectivo de insistir no coñecemento e posta en valor da principal arteria fluvial da Terra de Soneira e mais de recuperar o seu nome histórico de río do Porto, que xa o ilustrado José Cornide atestara en 1764 e corroborarán Domingo Fontán no s. XIX e Ramón Otero Pedrayo no XX. A proposta audiovisual explica a historia do nome do río, impropiamente denominado Grande desde a década dos sesenta, intercalándoa coa descrición do seu curso desde o seu nacemento nas abas orientais do Bico de Meda en terras xalleiras e bergantiñás, ata a súa desembocadura na ría de Camariñas.
A presentación contará coas intervencións de Xosé Mª Lema, presidente do SEMESCOM e patrón do Museo do Pobo Galego, Manuel Rial, director, guinista e voz do documental, e Pablo Alvite, encargado da fotografía, son e montaxe. Presentará o evento Augusto Pérez Alberti, catedrático emérito de Xeografía da USC.